Soliq xizmati organlarida ommaviy tadbirlar tashkil etish borasida II chorakda ham qator ishlar amalga oshirildi. Nafaqat xodimlar va ularning oila a’zolari uchun, balki keng jamoatchilik, ehtiyojmand qatlam vakillari uchun ham manfaatli tadbirlar tashkil etilishiga erishildi desak mubolag‘a bo‘lmaydi.

Xususan, joriy yilning 20-aprel kuni Vazirlar Mahkamasi huzuridagi Soliq qo‘mitasida “Sen kuchlisan” ijtimoiy loyihasi doirasida bemor bolalar ijodiga mansub san’at asarlari koʻrgazmasi bo‘lib o‘tdi. Unda 20 nafarga yaqin bolajonlar va ularning ota-onalari ishtirok etdi. Tadbir davomida bolajonlar tomonidan yaratilgan asarlar kimoshdi savdosi  oʻtkazildi.

Turli ma’naviy-ma’rifiy tadbirlar doirasida sport musobaqalari o‘tkazish an’anasi ham yo‘lga qo‘yilgani xodimlarning mehnat samaradorligi oshishiga hissa qo‘shmoqda.

Shu yilning 27-aprel kuni  Soliq qoʻmitasi huzuridagi “Yangi texnologiyalar” ilmiy-axborot markazi” DUK xodimlari sportning mini-futbol turi boʻyicha bellashdi. Musobaqa gʻoliblariga maxsus diplom va esdalik sovgʻalari topshirildi. 

Soliq xizmati organlari xodimlarida korrupsiyaga qarshi murosasizlikni kuchaytirish dolzarb vazifalar sirasidan. Shu maqsadda 3-may kuni Soliq qoʻmitasida Rais oʻrinbosari U.Sadullayev tizim xodimlariga korrupsiyaga qarshi kurashish yuzasidan murojaat qildi. 

Yig‘ilishda tizim sha’niga dog‘ tushiruvchi xatt-harakatlardan tiyilish, mansab vakolatlarini suiiste’mol qilmaslik, qonunchilikda belgilangan tartibda faoliyat yuritish zarurligi to‘g‘risida eslatma berib o‘tildi.

Soliq xizmati organlari xodimlarining ham ma’nan, ham jismonan sog‘lom bo‘lishlari uchun faoliyatni sport bilan uyg‘unlashtirishga alohida e’tibor qaratilmoqda.

Xususan, 8-may kuni  vazirlik va idoralar xodimlari hamda ularning oila a’zolari o‘rtasida “Sport — nafislik va salomatlik manbai” shiori ostida bo‘lib o‘tgan “Gimnastrada” sport festivalida Soliq qo‘mitasi ham munosib ishtirok etib, 30 ga yaqin tashkilotlar ichida eng yaxshi TOP-5 jamoalar safidan joy oldi hamda “Kompozitsiyani sahnalashtirishdagi kutilmagan yechimlari uchun” nominatsiyasi g‘olibi bo‘ldi. 

Soliq xizmati organlarida o‘tgan har bir kun, oy va yil, sharafli kasbning mashaqqatlariga chidab  yillar davomida erishilgan obro‘-e’tibor, hurmat shubhasiz keyingi avlod uchun ibrat maktabi bo‘lib xizmat qiladi. Shu bois 9-may – Xotira va qadrlash kuni munosabati bilan soliq xizmati organlarida uzoq yillar xizmat qilib, hozirda keksalik gashtini surayotgan soha faxriylari va bemor hamkasblar holidan xabar olindi. 

Soliq qo‘mitasi Raisi og‘ir toifadagi yoshlar bilan uchrashdi. Mirzo Ulug‘bek tumanidagi Markaziy istirohat bog‘ida tashkil etilgan uchrashuv ochiq va samimiy tarzda o‘tdi. Uchrashuvda Sherzod Kudbiyev yoshlarga oldiga qo‘ygan maqsadlariga erishishlari uchun tavsiyalar berdi. Ularni qo‘llab-quvvatlashga doim tayyorligini  bildirdi. 

Mas’ullarga har bir murojaatni qayd qilib va ijrosini to‘liq ta’minlash uchun muddat belgilab berildi. Yoshlarni o‘ylantirayotgan masalalarga yechimlar taklif qilindi.

Soliq xizmati xodimlari farzandlari uchun 1-iyun – Xalqaro bolalarni himoya qilish kuni munosabati bilan “Yangi Oʻzbekistonning yangi avlodi: Uchinchi Renessans bunyodkorlari oramizda!” mavzusida tadbir tashkil etildi. 

Tadbir davomida Respublika yosh tomoshabinlar teatrida bolajonlar uchun zamonaviy texnologiyalar yordamida maxsus shou dastur namoyish etildi. Bolajonlar rasm chizish, shaxmat-shashka stol tennisi va kubik-rubik yigʻish musobaqalarida bahslashdi. Musobaqalarda I, II va III  oʻrinni olgan bolalar maxsus diplom va esdalik sovgʻalari bilan taqdirlandi. 

Ma’naviy-ma’rifiy ishlar samaradorligini oshirish, davlat tili to‘g‘risidagi qonunchilik hujjatlariga rioya etilishini ta’minlash xizmati