Soliq xizmati organlarida xotin-qizlar oʻrtasida tadbirlar tashkil etish borasida II chorakda ham qator ishlar amalga oshirildi. Nafaqat xodimlar va ularning oila a’zolari uchun, balki keng jamoatchilik, ehtiyojmand qatlam vakillari uchun ham manfaatli tadbirlar tashkil etilishiga erishildi.

Xususan, joriy yilning 8-may kuni vazirlik va idoralar xodimlari hamda ularning oila a’zolari o‘rtasida “Sport — nafislik va salomatlik manbai” shiori ostida “Gimnastrada” sport festivali bo‘lib o‘tdi. Sog‘lom turmush tarzini targ‘ib qilish, xotin-qizlarni sportga bo‘lgan qiziqishini rivojlantirish maqsadida tashkil etilgan festivalda Soliq qo‘mitasining jamoasi munosib ishtirok etib, muxlislar olqishi va hakamlar e’tirofiga sazovor bo‘ldi. 

Soliq qo‘mitasi jamoasi 30 ga yaqin tashkilotlar ichida eng yaxshi TOP-5 jamoalar safidan joy olib, “Kompozitsiyani sahnalashtirishdagi kutilmagan yechimlari uchun” nominatsiyasi g‘olibi bo‘ldi.

Soliq qo‘mitasining ayol xodimlari uchun 12-iyun kuni Bo‘stonliq tumanidagi “Livingstone” hotelda bir kunlik kasaba uyushmasi tomonidan 16 kishilik bepul yo‘llanma berildi.

Ushbu tadbir xodimlarning ishchanlik kayfiyatini oshirish, ularning madaniy hordiq chiqarishlari uchun sharoit yaratish uchun ish faoliyatida namunali natijalar qayd etgan xodimlarni qo‘llab-quvvatlash maqsadida tashkil etildi.

O‘zbekiston Respublikasi Vazirlar Mahkamasi huzuridagi Soliq qo‘mitasi Raisining “Chet elga xizmat safariga yuborish to‘g‘risida” 2024-yil 25-iyundagi 208-xc-son buyrug‘iga asosan Soliq qo‘mitasi mas’ullari 30-iyun–6-iyul kunlari Turkiyaning Anqara shahrida xizmat safarida bo‘ldi.

Turkiya hamkorlik va muvofiqlashtirish agentligi (TIKA) tomonidan tashkil etilgan “Soliq amaliyotida dolzarb o‘zgarishlar va raqamli yechimlar” mavzusidagi malaka oshirish kursida Soliq qo‘mitasi hamda hududiy soliq xizmati organlari vakillari ishtirok etdi. Kurs davomida norasmiy iqtisodiyotga qarshi kurash, soliq amaliyotidagi joriy oʻzgarishlar va raqamli yechimlar bo‘yicha tajriba almashildi.

Mutaxassislar tomonidan Turkiya soliq tizimida daromadlar ma’muriyatining tashkiliy tuzilmasi, soliq idoralarining tashkiliy tuzilmasi, Interaktiv soliq idorasi – VEDOP, elektron arizalar: elektron hisob-faktura, elektron kitob, elektron chipta, to‘lovlarni qayd qilish qurilmalari, risk tahlili QQS(KDVİRA), SARP, RITAP, norasmiy iqtisodiyotga qarshi kurash, soliq nazorati va tekshirish jarayonlari, strategik rejalashtirish va statistika ishlab chiqarish, budjetni tayyorlash jarayoni va daromadlarni hisoblash kabi mavzularda darslar o‘tildi, shuningdek, Soliq idoralari faoliyati yuzasidan Turkiya tajribasi o‘rganildi.

Malaka oshirish kursi davomida Dog‘anbey soliq idorasi boshqarmasi direksiyasiga tashrif, Soliq nazorati kengashi raisligiga tashrif,  soliq aloqa markaziga (call center) tashrif, Ijtimoiy himoya tashkiloti tashkilotchiligida  yo‘l-yo‘riq va tekshirish boshqarmasiga (RTB) tashriflar amalga oshirildi. Yakunda Turk hamkorlik va muvofiqlashtirish agentligi tomonidan sertifikatlar topshirildi. 

Ma’naviy-ma’rifiy ishlar samaradorligini oshirish, davlat tili to‘g‘risidagi qonunchilik hujjatlariga rioya etilishini ta’minlash xizmati