Давлат солиқ хизмати органлари томонидан «Солиқчи – кўмакчи» тамойили доирасида амалга ошириладиган ишлар самарадорлигини таъминлаш мақсадида тасдиқланган “Ҳаракатлар режаси”га мувофиқ 4  босқич ва 9 йўналишда асосий вазифалар белгилаб олинган.

Унга кўра, фаолият кўрсатаётган ва кўрсатмаётган тадбиркорлик субъектлари солиқ органларида мавжуд маълумотлар асосида 21 та мезон бўйича сегментланиб, кўмакка муҳтож бўлган тадбиркорларга фаолиятини ривожлантиришга тўсқинлик қилаётган муаммоларни бартараф этишда тизимли чоралар кўрилмоқда.

Жумладан, 2021 йилнинг биринчи ярмида «Солиқчи – кўмакчи»  тамойили доирасида 94 048 та тадбиркорлик субъектига амалий ёрдамлар кўрсатилди. 

Хусусан, солиқ турлари бўйича 23 251 та субъектининг 3 141,6 млрд.сўм мавжуд ортиқча тўлов суммаси қайтариб берилди. Бош прокуратура ҳузуридаги Мажбурий ижро бюроси билан ҳамкорликда 295 та субъектнинг 18,9 млрд. сўмлик солиқ мажбуриятлари уларнинг дебитор қарздорликлари ҳисобидан ундирилиши ҳал этилди.

Вақтинчалик молиявий қийинчиликка учраган 508 та корхонанинг 39,5 млрд. сўм миқдоридаги солиқ қарзлари тўлов муддатлари узайтирилди. Ортиқча харажатлар ва қонун бузилишларидан сақлаш мақсадида 43 684 та тадбиркорлик субъектининг дастлабки бухгалтериясини юритишга кўмаклашилди. Шунингдек, янги ташкил этилган тадбиркорлик субъектларининг 5 212 тасига фаолият туридан келиб чиқиб, оптимал солиқ режимини танлашда ҳуқуқий ва амалий ёрдам кўрсатилди.

Солиқ тўловчиларнинг ҳуқуқларини кенг тарғиб қилиш орқали мавжуд имтиёзлардан фойдаланиш тартиби юзасидан яна 6 084 та тадбиркор билан тушунтириш ишлари олиб борилди. Солиқ қарзи тўғрисида маълумот сўраб мурожаат қилган тадбиркорлик субъектларига эса 13 459 та маълумотнома тақдим этилди.

Айланма маблағга муҳтож бўлган 852 та тадбиркорлик субъектига 150,4 млрд. сўм кредит олишда, 305 та тадбиркорлик субъектига ер ва бино олишда кўмаклашилди. Коммунал хизматлар бўйича 398 та субъектнинг   муаммолари ҳал этилди.  

Бунлардан ташқари, «Солиқчи – кўмакчи» тамойили мазмун-моҳиятини солиқ тўловчиларга етказиш мақсадида видеороликлар тайёрланиб, барча ҳудудларда оммавий ахборот воситалари орқали мунтазам равишда намойиш этиб борилмоқда. Хусусан, жорий йилнинг ўтган даврида (23 июль ҳолатига) оммавий ахборот воситалари орқали жами 604 та маротаба, шундан матбуот нашрларида 43 та, телеканалларда 35 та, радиоканалларда 13 та, интернет сайтларида 513 маротаба   чиқишлар   ташкил   этилди. Ижтимоий тармоқларга жами 2 135 та маълумотлар жойлаштирилди.

Давлат солиқ хизмати органлари томонидан «Солиқчи – кўмакчи» тамойили доирасида тарғибот-ташвиқот ишлари давом эттирилмоқда.