Жорий йилнинг 21 апрель куни Ўзбекистон Республикаси Президентининг «Тадбиркорликни қўллаб-қувватлаш тизимини такомиллаштириш, ишбилармонлик муҳитини янада яхшилаш бўйича қўшимча чора-тадбирлар тўғрисида»ги 5087-сон қарори қабул қилинди.

Мазкур қарор билан 2021 йил 1 июндан айрим тадбиркорлик субъектларига солиқларни бўлиб-бўлиб тўлаш имконияти берилди. Давлат солиқ қўмитасига ушбу имкониятдан фойдаланиш истагида бўлган солиқ тўловчилардан кўплаб саволлар келиб тушмоқда.

Солиқ қарзини ундиришни ташкил қилиш департаменти Давлат солиқ бош инспектори Шермуҳаммад Холбоев мазкур имкониятдан фойдаланиш бўйича энг муҳим саволларга жавоб берди.

Фаолият бошлаганига бир йил бўлган тадбиркорлик субъекти солиқларни бўлиб-бўлиб тўлаши мумкинми?

Ўзбекистон Республикаси Президентининг 2021 йилнинг 21 апрелдаги  ПҚ-5087-сон қарорига мувофиқ 2021 йил 1 июндан бошлаб уч йилдан ортиқ вақтдан буён фаолият кўрсатаётган ҳамда ҳисобланган солиқларни муддатида тўлаб келган, лекин молиявий аҳволига кўра солиқ қарзини тўлаш имкониятига эга бўлмаётган тадбиркорлик субъектларига солиқларни бўлиб-бўлиб тўлаши мумкин.

Фойдаланиш тартиби қайси ҳужжатда мавжуд?

Давлат солиқ қўмитаси Молия вазирлиги билан биргаликда солиқларни бўлиб-бўлиб тўлашнинг вақтинчалик тартибини ишлаб чиқиш ва янги тартиблар бўйича Солиқ кодексининг тегишли моддаларига ўзгартириш ва қўшимчалар киритиш устида иш олиб бормоқда.

Солиқ қонунчилигига тегишли ўзгартириш ва қўшимчалар киритиш ишлари якунлангунга қадар солиқ қарзини бўлиб-бўлиб тўлаш имконияти Давлат солиқ қўмитаси ва Молия вазирлигининг қўшма хати асосида тақдим этилади.

Гаровсиз бўлиб-бўлиб тўланадиган солиқ суммаси миқдори қанча?

Солиқ тўловчининг гаровсиз бўлиб-бўлиб тўланадиган солиқ қарзи суммаси унинг охирги уч йил давомида тўлаган солиқ суммасининг 50 фоизидан ошмаслиги лозим.

Солиқларни бўлиб-бўлиб тўлаш муддати қанча?

 Тадбиркорлик субъекти солиқ қарзини ўз хоҳишига кўра 12 ой муддатгача гаровсиз бўлиб-бўлиб тўлаши мумкин.

Имтиёзидан фойдаланиш учун қаерга мурожаат қилиш лозим?

Тадбиркорлик субъектлари солиқларни гаровсиз бўлиб-бўлиб тўлашлари учун Солиқ органларининг электрон давлат хизматлари порталидаги шахсий кабинети орқали ҳудудий давлат солиқ органларига белгиланган шаклдаги ариза билан мурожаат қилишлари мумкин.

Аризалар қанча муддатда кўриб чиқилади?

Тадбиркорлик субъектларидан келиб тушган ариза ўша санадан бошлаб 5 иш куни давомида солиқ органлари томонидан кўриб чиқилиб, бўлиб-бўлиб тўлаш имкониятини бериш ёки рад этиш тўғрисида қарор қабул қилинади. Якуний хулоса мурожаатчининг Солиқ органларининг электрон давлат хизматлари порталидаги шахсий кабинети юборилади.

Солиқларни бўлиб-бўлиб тўлаш имкониятини бекор қилиниши мумкинми?

Тадбиркорлик субъектлари томонидан солиқларни гаровсиз бўлиб-бўлиб тўлаш муддатлари бузилган тақдирда, солиқ органининг солиқларни гаровсиз бўлиб-бўлиб тўлаш тўғрисидаги қарори муддатидан олдин тугатилиши мумкин.

Бўлиб-бўлиб тўлаш имконияти берилган солиқ қарзига фоиз ҳисобланадими?

Гаровсиз бўлиб-бўлиб тўланадиган солиқ суммасига шу даврда амалда бўлган Ўзбекистон Республикаси Марказий банкининг қайта молиялаштириш ставкасига тенг ставкадан келиб чиққан ҳолда фоизлар ҳисобланади.