Normativ-huquqiy hujjatlar loyihalari muhokamasi portaliga O‘zbekiston Respublikasi Prezidentining “Suv resurslarini aniq hisobga olish tizimini yo‘lga qo‘yish va suv resurslaridan foydalanganlik uchun soliq bo‘yicha ma’murchilikni takomillashtirish chora-tadbirlari to‘g‘risida”gi qarori loyihasi joylashtirildi.

Maqsad – suv resurslaridan foydalanganlik uchun soliq bo‘yicha ma’murchilikni takomillashtirish orqali uning bazasini kengaytirish.

Loyihada:

barcha foydalanilgan suv resurslari hisobini yuritish bo‘yicha yagona avtomatlashtirilgan nazorat tizimini joriy qilish;

Suv xo‘jaligi vazirligi respublika hududidagi barcha suv resurslari, shu jumladan, qishloq xo‘jaligi sohasida foydalanilgan suv resurslari hisobini yuritish va ulardan samarali foydalanishni nazorat qilish bo‘yicha yagona maxsus vakolatli davlat boshqaruvi organi etib belgilash;

Suv xo‘jaligi vazirligiga suv olish joylarini suvni boshqarish va hisobga olish vositalari bilan jihozlash hamda suvdan foydalanish va suv iste’molida suv resurslarining hisobini yuritish yuzasidan tizimli monitoring o‘rnatilishini nazorat qilish vazifasi yuklatish nazarda tutilgan.

Shuningdek loyihaga ko‘ra, yer usti, yer osti, tabiiy hamda kommunal suv ta’minoti tizimi orqali foydalanilgan suvlar bo‘yicha suvdan foydalanishni iste’molchilar kesimida hisob va hisobotini yuritish, nazorat qilish hamda mazkur jarayonlarni to‘liq onlayn tarzda yuritish tartibi ishlab chiqiladi.

Foydalanilgan suv resurslari hajmi to‘g‘risidagi axborotni yagona integratsiyalashgan ma’lumotlar bazasida shakllantirish hamda Davlat soliq qo‘mitasi ma’lumotlar bazasiga real vaqt (onlayn) rejimida taqdim etib borilishi yuzasidan dasturiy ta’minot yaratiladi.

2022-yil 1-iyulga qadar tajriba tariqasida tumanlarda kamida 1 tadan namunali qishloq xo‘jaligi korxonalari “Smart Water” (“Aqlli suv”) o‘lchagichi va shu kabi raqamli texnologiyalar bilan jihozlanadi. shu orqali ularning suvdan foydalanish hamda suv iste’moli hisobi yuritiladi.

2022-yil 1-yanvardan uch yil muddatga:

- qishloq xo‘jaligi korxonalariga suv hisoblash vositalari bilan jihozlangan paytdan boshlab, suv resurslaridan foydalanganlik uchun belgilangan soliq stavkalari 0,5 kamaytiruvchi koeffitsiyent;

-“Smart Water” (“Aqlli suv”) o‘lchagichi va shu kabi raqamli texnologiyalarni joriy qilgan qishloq xo‘jaligi korxonalari uchun suv resurslaridan foydalanganlik uchun belgilangan soliq stavkalari 0,1 kamaytiruvchi koeffitsiyentni hisobga olgan holda qo‘llash;

- Sektor rahbarlarining tavsiyasiga asosan kam ta’minlangan va ishsiz aholiga takroriy ekin uchun yer maydoni ajratgan qishloq xo‘jaligi korxonalariga, ajratilgan yer maydoni qismi bo‘yicha suv resurslari iste’molining normativlari asosida aniqlanadigan soliq summasining 50 foizi miqdorini to‘lash huquqi berish taklif etilmoqda.

Bundan tashqari, hududiy Qoraqalpog‘iston Respublikasi va viloyatlar davlat soliq boshqarmalari tuzilmalarida Suv resurslari hisobini yuritish va nazorat bo‘limlari tashkil etish hamda ularga 270 ta qo‘shimcha shtat birligi, shu jumladan markaziy apparat uchun 3 ta shtat birligi ajratish nazarda tutilgan.

Davlat soliq qo‘mitasi Suv xo‘jaligi vazirligining yagona ma’lumotlar bazasi orqali suv resurslaridan foydalanganlik uchun soliq bazasini kengaytirish orqali byudjet daromadlarini oshirib boradi.

Qaror loyihasi bo‘yicha taklif berish 2022-yil 18-martgacha.