ҚҚСнинг отирқча суммаси ўрнини қоплаш (қайтариш) бўйича жорий этилган янги тартиб қулайлиги тадбиркорлар томонидан эътироф этилмоқда.

Ҳозирда Давлат солиқ хизмати органларига ҚҚСни қайтариш бўйича солиқ тўловчилар томонидан ариза келиб тушгач, аризалар 2 хил муддатда – ариза берилган кундан бошлаб 7 кундан ёки 60 кундан кечиктирмай кўриб чиқилмоқда.

Тадбиркорлик субъектлари учун ортиқча ҚҚС суммаси ўрнини қоплашнинг янги тизими Вазирлар Маҳкамасининг 2020 йил 14 августдаги “Қўшилган қиймат солиғи ҳамда чет эл юридик шахслари билан боғлиқ солиқ маъмурчилигини такомиллаштириш тўғрисида”ги 489-сонли қарори билан тасдиқланган.

ҚҚСни қайтаришнинг соддалаштирилган тизими доирасида Фарғона вилояти давлат солиқ бошқармасига жорий йил 29 октябргача 191 та корхона томонидан умумий миқдори 144,9 млрд. сўм бўлган ариза келиб тушди. Шундан 108 та хўжалик юритувчи субъектнинг аризалари ижобий ҳал этилиб, уларга 70,5 млрд. сўм миқдоридаги маблағлар қайтариш бўйича хулосалар берилди. Айни пайтда яна 29 та ҳолатда 28,4 млрд. сўм маблағларни қайтариш бўйича юборилган аризалар кўриб чиқилмоқда.

Фарғона вилоятида қишлоқ хўжалик махсулотларини қайта ишлаш фаолияти билан шуғулланувчи “Уз-Сеганг” Ўзбекистон-Жанубий Корея қўшма корхонасининг ортиқча ҚҚС суммаси қисқа фурсатларда қайтарилди. 

– ҚҚСнинг ортиқча суммасини қайтариш бўйича жорий этилган янги тартиб, биз тадбиркорлар учун айни муддао бўлмоқда, – дейди “Уз-Сеганг” қўшма корхонаси менежери Азизжон Маҳмудов. – Ўтган йили ҚҚСни қайтариш бўйича солиқ идораларига мурожаат қилганимизда, қатор камчиликлар туфайли аризамизни ижобий қаноатлантириш учун анча вақт талб этилганди. Янги тартибга кўра, аризаларни электрон тарзда юборяпмиз, агар аризамизда бирор камчилик кузатиладиган бўлса, дарҳол давлат солиқ бошқармаси мутахассислари биз билан тўғридан-тўғри алоқага чиқиб, тузатишлар киритилишига кўмаклашмоқдалар. Корхонамиз мисолида айтадиган бўлсам, октябрь ойининг ўзида ҚҚС ортиқча суммасини қайтариш бўйича икки марта ариза юбордик. Дастлабкисида 4 кун ичида, кейингисида 6 кун ичида – жами 1,2 миллард сўм маблағимиз қайтарилди. Албатта, ўз вақтида қайтарилган маблағлар фаолиятимизга ижобий таъсир этади.

Фарғона вилояти ДСБ

Матбуот хизмати