Налоговый комитет Республики Узбекистан

Тадбиркорларга 5 трлн сўмдан зиёд маблағлар қайтарилди

03/11/2020

2020 йил 1 январдан 31 октябргача бўлган даврда ҚҚСни қоплаш (қайтариш) доирасида давлат томонидан солиқ тўловчиларга 5 триллион сўмдан ортиқ маблағлар қайтарилди.

Таъкидлаш лозимки, Ўзбекистонда тадбиркорлик учун берилаётган имтиёзлар, қулай бизнес муҳити халқаро экспертлар томонидан юқори баҳоланмоқда. 2020 йилдаги янгиликлардан бири – бу тадбиркорлик фаолиятининг ривожланишига бевосита таъсир кўрсатадиган қўшилган қиймат солиғи (ҚҚС) қайтарилишининг янги тартиб ва шартлари татбиқ этилишидир.

Ҳозирда қўшилган қиймат солиғининг салбий фарқ суммаси ўрнини қоплаш (қайтариш) тартиби тубдан ўзгарди – у янада соддалаштирилди. Янги тартиб ва шартлар Вазирлар Маҳкамасининг 2020 йил 14 августдаги “Қўшилган қиймат солиғи ҳамда чет эл юридик шахслари билан боғлиқ солиқ маъмурчилигини такомиллаштириш тўғрисида”ги 489-сонли қарорида белгиланди.

Янги тартибга кўра, айни пайтда ҚҚСнинг салбий фарқ суммасини барча ҚҚС тўловчиларга қайтариш тартиби мавжуд. Аввал эса ҚҚСнинг ортиқча суммасини қайтариш фақат “ноль” ставка қўллаган экспортчи тадбиркорларга қўлланилар эди.

Янги тартиб ва шартларда муддатларга ҳам алоҳида эътибор бериш лозим. Бунда ҚҚС қайтариш йирик солиқ тўловчилар, дипломатик ваколатхона вакиллари, маҳсулот тақсимотига оид битим иштирокчилари (“ноль” ставка), солиқ мониторинги иштирокчиларидан ташқари барча ҚҚС тўловчилар учун 60 кундан кечиктирилмайди. Юқорида қайд этилган ҚҚС тўловчиларига эса бу муддат 7 кунни ташкил этади.

Солиқ тўловчилар ҚҚС қоплаш (қайтариш) бўйича ҳисобга олинган жойдаги давлат солиқ бошқармасига, йирик солиқ тўловчилар эса Йирик солиқ тўловчилар бўйича ҳудудлараро давлат солиқ инспекциясига мурожаат қилади.

ДСҚ Матбуот хизмати