Тошкент солиқ коллежида Ўзбекистон Республикаси Олий Мажлиси Сенатининг Бюджет ва иқтисодий ислоҳотлар масалалари қўмитаси томонидан “2020 йил учун Ўзбекистон Республикасининг Давлат бюджети тўғрисида”ги Ўзбекистон Республикаси Қонунининг мазмун-моҳиятига бағишланган семинар ўтказилди.

Тадбирда Олий Мажлис Сенати аъзолари, коллеж ўқитувчилари ва ўқувчилари иштирок этди.

Семинарда сўзга чиққанлар Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифалар асосида солиқ сиёсатида амалга оширилаётган ўзгаришлар ва уларнинг натижаларига тўхталиб ўтдилар.

Шу ўринда Сенатнинг йигирма тўртинчи ялпи мажлисида сенаторлар томонидан маъқулланган “2020 йил учун Ўзбекистон Республикасининг Давлат бюджети тўғрисида”ги Ўзбекистон Республикаси Қонунининг мазмун-моҳияти ҳақида сўз юритилди.

Таъкидланганидек, Ўзбекистоннинг ҳар бир фуқароси Давлат бюджети маблағларини шакллантириш ва улардан фойдаланишда иштирок этади. Жумладан, юртдошларимиз Давлат бюджети маблағларини шакллантиришда солиқ тўловчи сифатида улардан фойдаланишда давлат томонидан тақдим этиладиган қулайликлар ва хизматларнинг истеъмолчиси сифатида қатнашадилар.

2019 йилдан бошлаб фуқаролар туманлар ва шаҳарлар бюджетларининг қўшимча манбалари ҳисобига молиялаштириладиган тадбирларни белгилашда ҳам иштирок этишлари мумкин. Бу мақсадларга туман ёки шаҳар бюджетлари қўшимча манбаларининг камида 10 фоизи йўналтирилади.

Анжуманда мазкур Қонун Ўзбекистон Республикаси Олий Мажлиси палаталари, вилоятлар ва Тошкент шаҳар халқ депутатлари Кенгашларининг бюджетни тайёрлаш, тасдиқлаш ва ижро этиш жараёнидаги роли ва масъулиятини янада кучайтиришга хизмат қилиши таъкидланди.

Ислоҳотлар натижасида солиқ сиёсатининг юқори самарадорлиги, демакки давлат томонидан ўз вазифаларининг юқори даражада бажарилиши учун молиявий замин мустаҳкамлиги таъминланиши кўрсатиб ўтилди.

Савол-жавобларга бой тарзда ўтган семинар барча иштирокчиларда катта қизиқиш уйғотди.