Joriy yilning 27-yanvar kuni O‘zbekiston Respublikasi Prezidentining “Xizmatlar sohasini rivojlantirishga oid qo‘shimcha chora-tadbirlar to‘g‘risida”gi PQ-104-son qarori qabul qilindi.

Hujjatda xizmatlar sohasini rivojlantirish, tadbirkorlik subyektlarini moliyaviy resurslar va infratuzilma bilan ta’minlash hamda ularga qulay soliq rejimini joriy etish yuzasidan qo‘shimcha chora-tadbirlar belgilandi.

Jumladan:

 a) 2022-yil 1-apreldan 2025-yil 1-yanvarga qadar:

 chakana savdo va umumiy ovqatlanish, mehmonxona (joylashtirish) xizmatlari, avtotransportda yo‘lovchi va yuk tashish, transport vositalarini ta’mirlash va ularga texnik xizmat ko‘rsatish, kompyuter xizmatlari, maishiy texnikani ta’mirlash, agro va veterinariya xizmatlarini ko‘rsatuvchi hamda ko‘ngilochar maskanlarda xizmatlar ko‘rsatuvchi tadbirkorlik subyektlari uchun ijtimoiy soliq stavkasi 1 foiz etib belgilandi.

Mazkur soliq imtiyozi tadbirkorlik subyektlarining ushbu faoliyat turlarini amalga oshirishdan olgan daromadlari joriy hisobot (soliq) davri yakunlari bo‘yicha jami daromadning kamida 60 foizini tashkil etsa, qo‘llaniladi.

Bunda, yuqorida sanab o‘tilgan faoliyat turlari bilan shug‘ullanuvchilar tomonidan xodimlar sonini yashirish holatlari aniqlanganda, mazkur soliq imtiyozining amal qilishi to‘xtatiladi hamda qonunchilikda belgilangan moliyaviy sanksiyalar qo‘llaniladi.

b) 2022-yil 1-yanvardan boshlab 2027-yil 1-yanvargacha mehmonxona (joylashtirish vositalari) va maydoni 5 ming kv.m. dan yuqori bo‘lgan savdo komplekslari (shu jumladan, ular egallagan yer uchastkalari) bo‘yicha:

 - yuridik shaxslardan olinadigan yer solig‘i va mol-mulk solig‘i stavkalari 90 foizga kamaytirilmoqda. Bunda 2027-yil 1-yanvargacha yangidan quriladigan obyektlarga (shu jumladan, ular egallagan yer uchastkasiga) nisbatan mazkur imtiyoz ular foydalanishga topshirilgan oydan boshlab 5 yil muddat davomida qo‘llaniladi;

- foyda solig‘ini hisoblashda binolarning qiymatini ikki yil davomida amortizatsiya xarajatlari sifatida chegirish huquqi berilmoqda;

v) 2022-yil 1-apreldan boshlab 2025-yil 1-yanvargacha ro‘yxat bo‘yicha tuman va shaharlarda belgilanadigan turizm hududlarida ro‘yxatdan o‘tgan hamda ushbu hududda umumiy ovqatlanish, mehmonxona (joylashtirish), savdo, ko‘ngilochar, turoperator va turagent xizmatlarini ko‘rsatayotgan tadbirkorlik subyektlari uchun:

- aylanmadan olinadigan soliq stavkasi – 1 foiz;

- ushbu hududlardagi obyektlar va ular egallagan yer uchastkasi bo‘yicha yuridik shaxslarning mol-mulkiga solinadigan soliq va yer solig‘i miqdorlari – mazkur soliqlar bo‘yicha hisoblangan summaning 1 foizi miqdorida belgilanmoqda.

g) jismoniy shaxslar tomonidan mahallalararo savdo-xizmat ko‘chalari bo‘yida joylashgan turar joy obyektlari “a” bandda keltirilgan xizmat ko‘rsatish turlari bo‘yicha noturar joy obyekti toifasiga o‘tkazilganda 2024-yil 1-yanvarga qadar ularga nisbatan mol-mulk solig‘i va yer solig‘ining jismoniy shaxslar uchun o‘rnatilgan stavkasi saqlab qolinadi;

d) 2022-yil 1-yanvardan uyali aloqa operatorlari uchun aksiz solig‘i stavkasi 10 foiz etib o‘rnatilmoqda;

ye) 2022-yil 1-apreldan qishloq joylarda antenna-machta metall konstruksiyalarini, ularga o‘rnatilgan va ularning ajralmas qismi bo‘lgan konstruksiyalar hamda ular egallagan yer uchastkalarini yuridik shaxslarning mol-mulkiga solinadigan soliqdan va yer solig‘idan ozod etish belgilanmoqda.