Davlat soliq qo‘mitasida yutuqli chek o‘yinlarining omadli chek sohiblari taqdirlandi. 

DSQ yutuqli o‘yinlarining navbatdagi tiraji 29-iyul kuni Xiva shahrida (Xorazm viloyati) o‘tkazildi. O‘yin 22:00dan boshlab “O‘zbekiston” telekanali va rasmiy saytida to‘g‘ridan-to‘g‘ri efirga uzatildi. Unda onlayn nazorat-kassa texnikalaridan berilgan 149 252 ta chek ishtirok etdi. Taqqoslash uchun, birinchi tirajda 9 mingdan ziyodroq chek ro‘yxatdan o‘tkazilgan. 

Bu galgi tirajda ham bir qator qimmatbaho sovrinlar jamlanmasi o‘ynaldi: 3 ta televizor, 3 ta kondisioner, 3 ta gaz plitasi, 3 ta mobil telefon, sanatoriyga 3 ta yo‘llanma, 4 ta velosiped, 5 ta pul mukofoti va Chevrolet Spark avtomobili. Toshkent shahri, Andijon, Buxoro, Namangan, Jizzax, Samarqand, Sirdaryo, Surxondaryo, Farg‘ona va Toshkent viloyatlari iste’molchilari g‘oliblar qatoridan joy oldi. 

2021-yildagi yettinchi tirajning eng omadli ishtirokchisi Toshkent shahri Sergeli tumanida istiqomat qiluvchi 24 yoshli Timur Urakov bo‘ldi. U  84 ming so‘mlik xaridni amalga oshirib, berilgan QR-kodli chekni Soliq mobil ilovasida ro‘yxatdan o‘tkazgan xolos. Shuning evaziga Chevrolet Spark avtomobili sohibi bo‘ldi. 

– Ushbu o‘yinda ikki oydan beri ishtirok etib kelyapman. Yutuqli chek o‘yinlari reklama bannerini ko‘rib o‘yinga qiziqib qoldim. Odatiy xaridlarim uchun olgan 20 ga yaqin chekni ro‘yxatdan o‘tkazgan edim. Lotereya chiptalarini sotib olishning hojati yo‘qligi va o‘yin to‘g‘ridan-to‘g‘ri efirda o‘tkazilishi qiziqishlarimni yanada orttirdi. Menga jonli efirdan qo‘ng‘iroq qilib, g‘olib bo‘lganim haqida aytishganida do‘stlarim bilan tog‘da dam olishda edim. Xursandchiligimning chek-chegarasi yo‘q edi. Bu haqda dastlab ota-onamga xabar berdim. Ular esa mendan ham ko‘proq xursand bo‘lishdi. To‘g‘risini aytsam, toki menga g‘olib bo‘lganligim haqida SMS-xabarnoma kelmagunicha biroz shubhalangan edim. 25 avgust tug‘ilgan kunim, bu men uchun eng zo‘r sovg‘a bo‘ldi. O‘ynang va omadga ishoning!

Boshqa sovrindorlar ham o‘z quvonchini biz bilan o‘rtoqlashdi.

Naima Sobirova, pensioner (pul mukofoti sohibasi): 

– Yutuqli o‘yinlarda butun oilamiz bilan birga ishtirok etamiz. Barcha cheklarimizni o‘g‘lim ro‘yxatdan o‘tkazib, ularni asl holida saqlab qo‘yadi. Uning aytishicha, chek talab qilish tadbirkorlarni halol va shaffof ishlashga undaydi. Byudjetga tushumlar tushishi ta’minlanadi va men kabi pensionerlar o‘z vaqtida pensiya oladi. Yutuqli o‘yinlarni har doim jonli efirda ko‘rib boraman. Bu ijtimoiy loyiha menga juda yoqadi. Jamiyat uchun kerakli va foydali, barchaga sovrinlar yutish imkoniyatini beradi. 

Irina Po‘latova, go‘zallik saloni direktori (mobil telefon sohibasi): 

– Tanishim chekning QR-kodini skaner qilayotganini ko‘rib qoldim. Undan nima qilayotganini so‘radim va men ham yutuqli o‘yinlarda ishtirok etish uchun cheklarni ro‘yxatdan o‘tkazishni boshladim. Juda ajoyib g‘oya – iste’molchilarda xarid uchun chek talab qilish orqali o‘z huquqlarini himoya qilish ko‘nikmasini shakllantiradi. Menimcha, shu boisdan ham qonuniy tarzda faoliyat yuritayotgan tadbirkorlarning mijozlari soni oshib bormoqda. Yutuqli o‘yinlarda ishtirok etishni davom ettirib, yana ko‘plab sovg‘alar yutib olishni istayman.

Oybek Xaydarov, tadbirkor (gaz plitasi sohibi): 

– To‘rt oy avval hamkasblarimdan Davlat soliq qo‘mitasi tomonidan onlayn kassa QR-kodli cheklari ishtirokida yutuqli o‘yin o‘tkazilayotgani haqida bilib oldim. Shundan beri muntazam ravishda ishtirok etib kelyapman. Gʻolib bo‘lganimni eshitib barcha tanishlarim, qo‘ni-qo‘shnilarim yutuqli o‘yinlarda ishtirok etishni boshlab yubordi. Avval ishonmaganlar ham o‘yinda ishtirok etish shartlarini so‘ramoqda. Siz ham ishtirok eting va men kabi sovrindor bo‘ling!