Хабарингиз бор 2020 йил июль ойидан бошлаб Давлат солиқ қўмитаси тажриба тариқасида ютуқли чек ўйинлари ўтказиб келмоқда. Унда Тошкент шаҳридаги онлайн НКМ ёки виртуал кассадан фойдаланишга ўтган тадбиркорлик субъектлари томонидан тақдим қилинган чеклар иштирок этмоқда.

Ҳар бир тиражда кир ювиш машинаси, кондиционер, газ плитаси, телевизор ва бошқа рўзғор учун зарур бўлган майиший техникалар ўйналмоқда. Бундан ташқари, энг омадли иштирокчи супер ютуқ – Chevrolet Nexia 3 автомобили соҳиби бўлмоқда. Шу пайтгача иккита ана шундай омадли чек соҳиблари аниқланди.

Бундан нима наф?

Ютуқли ўйинлар иштирокчиларга қимматбаҳо совғалар тақдим этиш билан бир қаторда, истеъмолчилик маданиятини оширишга хизмат қилади.

Ютуқли ўйинларнинг ижтимоий-иқтисодий аҳамияти:

– жамоатчилик назорати ўрнатилишини таъминлайди;

– савдо маданиятини оширади; хизмат кўрсатувчи ходимларнинг касбий маҳорати ва этикасини белгилайди

– сотувчиларда масъулият ҳиссини юксалтиради;

– яширин иқтисодиёт улушини қисқартиради;

Шунингдек, истеъмолчиларни фуқаролик позциясида қатъий туришга ундайди. Уларни ўз ҳуқуқлари учун курашишга ўргатади.

Қандай чеклар ютуқли ўйинда иштирок этади?

Тошкент шаҳридаги онлайн НКМ ёки виртуал касса билан жиҳозланган савдо (хизмат кўрсатиш) нуқтасидан олинган маҳсулот (хизмат) учун QR кодли чек олиб уларни рўйхатдан ўтказиш керак. 

Чекларни рўйхатдан ўтказишнинг икки усули бор:

– QR кодини “SOLIQ”  мобил иловаси ёрдамида сканер қилиш;

– 12 хонали фискал белгисини 1077 рақамига SMS тарзида юбориш.

Энг муҳим шарт: рўйхатдан ўтказилган чеклар асл ҳолида сақланиши шарт. Яроқсиз ҳолдаги – йиртилган, бўялган ёки ёзувлари ўчиб кетган чеклар ҳақиқий ҳисобланмайди.

Эслаб қолинг! Ютуқ чиққан чеклар яроқсиз ҳолда тақдим этилса, бундай чеклар соврин олиш учун асос бўлмайди.

 Ютуқли ўйинлар учун чеклар қаерда берилади?

Президентимизнинг 2019 йил 6 сентябрдаги ПФ-5813-сонли Фармонида  нақд пул тушумига эга бўлган тадбиркорлик субъектларининг онлайн назорат касса машиналари ёки виртуал кассадан фойдаланишга босқичма-босқич ўтказиш графиги тасдиқланган.

Бугунги кунда республка миқёсида турли савдо нуқталарида ўрнатилган 40 мингдан ортиқ онлайн НКМ ёки виртуал касса рўйхатга олинган. Шу жумладан, Тошкент шаҳрида 5 мингга яқин онлайн касса техникаси рўйхатдан ўтказилган.

Истеъмолчилар “SOLIQ”  мобил иловасини юклаб олиб, геолокация хизмати орқали онлайн касса билан жиҳозланган шохобчаларни осонгина топиши мумкин.

Шунингдек, ҳар бир ана шундай савдо нуқтасида Онлайн НКМ ёки виртуал касса мавжудлиги тўғрисидаги маълумот акс эттирилган махсус стикер ёпиштирилган. 

Муҳим шартлар

Ўйинда барча хоҳловчилар иштирок этиши мумкин. Ушбу босқичда Тошкент шаҳридаги онлайн НКМ ва виртуал кассалардан берилган чеклар иштирок этмоқда. Кейинчалик бошқа ҳудудлардаги истеъмолчилар ўртасида ҳам ўтказилиши режалаштирилган.

Ғолиблар орасида 18 ёшга тўлмаган ва муомалага лаёқатсиз жисмоний шахслар аниқланса, ютуқлар уларнинг қонуний вакиллари томонидан вакиллигини тасдиқловчи ҳужжатларни кўрсатган ҳолда олиниши мумкин.

ДСҚ ютуқли ўйинларининг бошқа ўйинлардан яна бир афзаллиги шундаки, бунда ютуқ соҳиблари жисмоний шахслардан олинадиган даромад солиғи тўлашдан озод бўлади. Яъни, соврин учун тўланадиган даромад солиғи ташкилотчи томонидан тўлаб берилади.

 Ҳурматли фуқаролар, агар Сиз тўлов учун чек берилмаслик ёки назорат-касса машиналаридан фойдаланиш талаблари бузилиши ҳолатларига дуч келсангиз, қуйидаги манбалар орқали Давлат солиқ хизматига мурожаат қилинг:

“Soliq hamkor” ахборот тизими –

– Soliq мобил иловасининг “Солиқ ҳамкори” бўлими;

– Солиқ органларининг электрон давлат хизматлари портали -my.soliq.uz

– телеграм бот - @soliq_hamkor_bot орқали

Шунингдек, ДСҚ - Ишонч телефони – 71-244-98-98 ва Call-маркази 1198 рақамларига 

Эслатиб ўтамиз, қонунчиликда белгиланган муддатларда тўловларнинг онлайн тизимидан фойдаланишга ўтмаслик ёки фойдаланиш талабларини бузиш 5 млн. сўмдан 20 млн. сўмгача жаримага сабаб бўлади. (СК. 221-модда)

Ғолиб бўлиш эҳтимоли харид миқдорига боғлиқ эмас. Чеклар сони қанчап кўп бўлса совриндор бўлиш эҳтимоли шунча юқори бўлади.

Чекларни талаб қилинг, рўйхатдан ўтказинг, сақлаб қўйинг ва ютуқли ўйин иштирокчисига айланинг!

 ДСҚ Матбуот хизмати