Давлат солиқ қўмитаси марказий аппаратида ютуқли чек ўйинларининг навбатдаги тиражи ғолибларига совринлар тантанали равишда топширилди. Бошқа ҳудудлардан ғолиб бўлганларга эса совринлар яшаш жойларидаги ҳудудий давлат солиқ органлари томонидан топширилди. 

Жорий йил 25 март куни бўлиб ўтган учинчи тиражда 25 та соврин, жумладан супер ютуқ – Chevrolet Spark автомобили ўз эгасини топди. Ўйинда мамлакатимизнинг барча ҳудудларида жойлашган савдо нуқталаридаги онлайн-назорат касса машиналари ва виртуал кассаларнинг 155 мингдан зиёд QR-кодли чеки иштирок этди.

25 та соврин: 5 та пул ютуғи, 3 та телевизор, 3 та кондиционер, 3 та газ плитаси, 3 та мобил телефон, санаторийга 3 та йўлланма, 4 та велосипед ва Chevrolet Spark автомобили.

Муҳим! Ғолиб иштирокчи ўз совринини фақат асл ҳолатда сақланган чекнинг оригиналини тақдим этганда олиши мумкин.

Омадли чек соҳиблари ўз таассуротлари билан ўртоқлашди:

Ксения Гордиенко, сувенир маҳсулотлари дизайнери (кондиционер соҳибаси): 

Кондиционерни болалар хонасига ўрнатамиз, бу қизимизга қувонч улашади. Ва албатта, чекларни рўйхатдан ўтказишда давом этамиз.

Мен атрофимдагилар – ота-онам, турмуш ўртоғим ва дўстларимнинг ишончсизлик билдиришига қарамай, чек ўйинларида қатнашишда давом этиб келдим. Чекларни талаб қилиш ва рўйхатдан ўтказиш одатимга айланди. Ушбу ижтимоий лойиҳа – истеъмолчиларни рағбатлантиришнинг жуда яхши ўйланган усули.

Мен ғолиб бўлганимдан сўнг кўпчилик чекнинг фискал белгиси ва QR-коди, шунингдек акция билан боғлиқ бошқа жиҳатлар ҳақида сўрай бошлади. Аминманки, ютуқли чек ўйинлари ихлосмандлари сони тобора ортиб боради.

Фарҳод Юсупов, мобил компания сервис-техник ходими (пул ютуғи соҳиби): 

Чек ўйинида ўтган йилдан бери қатнашаман. Мен ҳар бир харид учун чек берилишига алоҳида эътибор бераман ва QR-кодини сканерлаш орқали рўйхатдан ўтказаман. Ўйин жонли эфирини, жамоатчиликка эълон қилинган натижаларни доим кузатиб бораман.

Дўстларим ва ишонмаётганларга ғолиб бўлганим ҳақида гапириб, уларни иштирок этишга чорлаш, бахтли одамлар қаторида бўлиш жуда ёқимли. Ғалаба – бу тасодиф ва омад!

Анжела Абдуллаева, бухгалтер (санаторий йўлланмаси соҳибаси): 

Менга содда ва тушунарли шартларда ўтказилаётган ютуқли чек ўйинлари жуда ёқади: чекларни фискал белгиси билан рўйхатдан ўтказасиз ва жонли эфирни кутасиз. Ўйин куни турмуш ўртоғим билан мен чекларга берилган рақамларни ёздик ва жараённи ҳаяжон билан кузатдик. Рўйхатимиздаги чеклардан бирининг 6 та рақами мос келганда, мен ўзимда йўқ хурсанд бўлиб кетдим.

Яқин келажакда совриндан фойдаланиб табиат бағрида дам олишни режалаштиряпмиз.

Махтума Шаумарова, дизайнер-конструктор (Spark автомобили соҳибаси): 

Отамнинг туғилган кунида қилинган харидларимиз учун берилган чек бизга омад келтирди. Отам 75 ёшга кирди ва байрам самимий оилавий муҳитда ташкил этилди. Ажабланарлиси шундаки, рўйхатдан ўтказган чекларимиз ичида айнан ушбу чек ғолиб бўлди. Бу ҳам бир мўжиза! 

Аввал, мен чекларнинг бир-биридан фарқ қилишини билмас эдим. QR-кодли чеклар нафақат савдо тармоқлари филиалларида, балки дорихоналарда, ёқилғи қуйиш шохобчаларида ва бошқа кўпгина дўконларда берилар экан. Сиз харидни амалга оширасиз, чекни оласиз ва уни рўйхатдан ўтказасиз - бу қийин иш эмас. 

Автомобиль ютиб олиш ҳар доим ҳам насиб этавермайди. Мен бу кутилмаган сюрприздан жуда хурсандман!

ДСҚ Матбуот хизмати