Давлат солиқ қўмитасида ютуқли чек ўйинларининг жорий йилдаги биринчи тиражи ғолибларига совғалар тантанали равишда топширилди.

30 январь куни «O’zbekiston» телеканали орқали жонли эфирда бўлиб ўтган биринчи тиражда Тошкент шаҳри, шунингдек, Тошкент, Бухоро, Наманган, Жиззах, Хоразм, Қашқадарё, Фарғона, Самарқанд вилоятлари ва Қорақалпоғистон Республикасидан 25 нафар ғолиблар аниқланди. Барча омадли чек эгалари пойтахтга таклиф қилинди. Ғолибларнинг хоҳишларига кўра совринларни ўзлари истиқомат қилаётган ҳудуддан олиш имконияти хам яратилди. Асосийси – ютуқли чекни тақдим этиш.

Ютуқли чек эгаларига 5 та пул мукофоти, 3 та телевизор, 3 та кондиционер, 3 та газ плитаси, 3 дона мобил телефон, санаторияга 3 та йўлланма, 4 дона велосипед ва Chevrolet Spark автомобили топширилди.

Ғолибларнинг баъзилари тақдирлаш маросимидаги ёрқин таассуротлари билан ўртоқлашдилар. 

Евгения Содиқова - пенсионер (ютуқ – пул мукофоти):

– Мен ўтган йилдан бери ютуқли чек ўйинларида иштирок этаман ва ҳар бир тиражни диққат билан кузатиб бораман. Ютуқ кутилмаган ва ёқимли бўлди. Бу хушхабарни қизим ва дўстларим билан бўлишдим. Уларнинг барчаси ютуқли чек ўйинларига қизиқиб қолишди ва дарҳол «Soliq» мобил иловасини юклаб олдилар. Ютуқли чек ўйинларига қизиқувчилар сони қанча кўп бўлса, шунча кўп истеъмолчилар ўз ҳуқуқларини билиб, чекларни талаб қилишади.

Рустам Зарипов - қурувчи-муҳандис (ютуқ – «Хумсон» санаториясига йўлланма): 

–Ижтимоий тармоқлар орқали ютуқли чек ўйинлари ҳақида тасодифан билиб қолдим ва ҳеч кимга айтмасдан чекларни рўйхатдан ўтказишни бошладим. Мана ҳақиқий омад – 5 дона чекларимдан бири ютуқли бўлди! Ажабланган қариндошларим ютуқ билан табриклашди ва улар ҳам ўйинда иштирок этишни бошлади. Эндиликда дорихоналар, ёқилғи қуйиш шохобчалари, йирик савдо тармоқлари ва алкогол маҳсулотлари сотиладиган дўконлардан чекларни талаб қиляпмиз. Биз автомобил ютиб олишни чин дилдан ният қилдик! 

Шахноза Абдукозирова - уй бекаси (ютуқ - велосипед):

– Мен ва менинг оилам жуда қизиқувчанмиз, лотореялар, танловлар, ютуқли ўйинларни жуда ҳам яхши кўрамиз, лекин шу пайтгача бирон маротаба ютмаганмиз. Велосипед бу – ҳаётимиздаги илк омадли ютуғимиз! Ютуқли чек ўйинлари – жуда қизиқарли ва фойдалидир. Чекнинг 12 сондан иборат фискал белгисини 1077 рақамига SMS тарзида юбориш ва ютуқ ўтказиладиган жонли эфирни кутишнинг ўзи кифоя. Биз ютуқ эгаси бўлганимизни мана шундай билиб олдик. Иштирок этинг ва ғолиб бўлинг! 

Иброҳимхўжа Сайдалиев (ютуқ - Chevrolet Spark автомобили):

– Биз дўстларимиз билан ўтган йилдан буён QR кодли чекларни йиғиб келамиз. Ютуқли чек ўйинларининг бизга ёққан томони, ҳеч қандай ортиқча харажатларни талаб қилмайди: биз фақатгина харидимиз учун берилган чекларни рўйхатдан ўтказамиз, холос. Биринчи тираж учун жами 40 та чекларни рўйхатдан ўтказдим ва ютуқ эгаси бўлишни чин дилдан истадим. Лекин жонли эфирда менга қўнғироқ қилиб, автомобил эгаси бўлганимни айтишганида ҳақиқатдан ҳам ўзимни йўқотиб қўйдим. Бу дўстларимнинг хазилларидан бири бўлса керак деб ўйладим. Ижтимоий тармоқлар орқали жонли эфирни кўрганимдан кейингина бунга ишондим.

2021 йил илк қувончни тақдим этди – бошқаларга ҳам омад кулиб боқсин!

 ДСҚ Матбуот хизмати.