Шаҳрисабз шаҳри чеккасидаги “Файзобод” маҳалласи. Карнай-сурнай садоси остида қувончли хабар баланд овозда эълон қилинди – Жаҳонгир ака машина ютиб олди! Бу омадли одам дорихонадан 21 минг сўмга дори харид қилган ва берилган чекни ютуқли чек ўйинида иштирок этиш учун рўйхатдан ўтказган эди. Кутилмаганда жонли эфирдан қўнғироқ қилиб “Табриклаймиз, Сиз Chevrolet Nexia 3 автомашинаси соҳиби бўлдингиз!” – деган сўзларни эшитган муҳандис-технолог ҳайратдан қотиб қолди. 

Жаҳонгир Раҳмонов тўқимачилик фабрикасида ишлайди, рафиқаси Нигора билан биргаликда уч нафар фарзандни вояга етказган. Икки қизи турмуш ўртоғи билан бахтли ҳаёт кечирмоқда, ўғли Тошкент давлат техника университети талабаси. Жаҳонгир ака ютуқли чек ўйинларига қизиқиб қолиб унинг ҳаққонийлигини текшириб кўриш учун иккита чекни рўйхатдан ўтказган эди.

– Чек ўйинлари – ноодатий акция.  Унинг кўлами пойтахтдан ошиб, республикамизнинг барча ҳудудларидаги аҳоли иштирок этиш имкониятига эга бўлганида жуда хурсанд бўлдим. Менга ёққан томони – ўйинда иштирок этиш учун лотерея чипталарини сотиб олишнинг ҳожати йўқ ва турли кодларни қидириб юрмайсиз. Барчаси жуда оддий – харидларимиз учун берилган чекларни рўйхатдан ўтказиб қўйшимиз керак холос. Яъни чекнинг QR кодини SOLIQ иловасида сканер қилиш ёки 12 хонали фискал белгисини 1077 рақамига SMS тарзида юбориш керак. Мен иккинчисини танладим. Менга ва мен каби катта ёшлилар учун  шуниси қулайроқ. 

Ташкилотчиларнинг айтишича, чек ўйинлари – бу онлайн назорат-касса машинаси ёки виртуал кассадан берилган чеклар иштирокидаги ўтказиладиган ютуқли ўйин. Бундай чеклар дорихоналарда, ёқилғи қуйиш шохобчаларида, алкоголь ва тамаки маҳсулотлари савдо шохобчаларида ҳамда йирик савдо тармоқларида берилади. Ютуқли чек ўйинларида иштирок этиш қоидалари ҳақида кўпроқ маълумот олиш учун қуйидаги ҳаволага ўтинг.

Биринчи тираж, июль ойида ўтказилган эди. Ўшанда 9 947 та чек рўйхатдан ўтказилганди. Кейинги тиражларда чеклар сони ошиб борди. Таққослаб кўринг – бешинчи тиражда 105 112 та чек иштирок этди. Ҳар бир тиражда омадли иштирокчилар телевизор, кондиционер, газ плитаси, кир ювиш машинаси, дазмол, велосипед ҳамда супер ютуқ –  Chevrolet Nexia 3 автомобили соҳиби бўлади.

 Ўйин бошидан буён ғолибларга 100 дона соврин, шу жумладан, бешта автомобил тақдим этилди.  Совринлар Бухоро, Қашқадарё, Самарқанд, Тошкент вилоятлари ва Тошкент шаҳрида яшовчи иштирокчиларга етказилди.