Fiskal modul bilan ta’minlash va operator tomonidan ko‘rsatiladigan xizmatlar uchun tadbirkorlik subyektlari tomonidan yilda bir marta BHM 1 baravari (270 000 so‘m) miqdorida operatorga to‘lov amalga oshiriladi. 

VM-943-son qarori 55-band 23.11.2019

Fiskal ma’lumotlar operatori – DSQ huzuridagi “Yangi texnologiyalar” ilmiy-axborot markazi DUK. 

Operator maxsus texnika vositalari bilan jixozlangan, milliy kriptografik algoritmlar bazasi asosida axborot xavfsizligini ta’minlashning kriptografik usullaridan foydalangan holda, real vaqt rejimida axborot-telekommunikatsiya tarmog‘i orqali onlayn-NKM va virtual kassalarga biriktirilgan fiskal modullardan keladigan ma’lumotlarni uzluksiz ravishda qabul qiladi, qayta ishlaydi va saqlaydi, shuningdek, vakolatli organning ma’lumotlar bazasini shakllantiradi.

Soliq to'lovchilarga xizmat ko'rsatishda operatorning vazifalari va majburiyatlari: 

• fiskal modullar va fiskal ma'lumotlar xavfsizligini ta'minlash; 
• fiskal modulning xotirasi to'lganda uni bepul almashtirishni amalga oshirish; 
• fiskal ma’lumotlarni qabul qilingan vaqtdan boshlab 5 yil muddatda saqlash;
• fiskal ma’lumotlarni qabul qilish jarayonida ularni o‘zgartirish, bloklash yoki yo‘q qilish imkoniyatini cheklash;
• fiskal ma’lumotlar bazasining zaxira nusxalari yuritilishini ta’minlash;
• fiskal modul foydalanuvchilarining shaxsiy ma’lumotlarini himoya qilish;
• onlayn-NKM va virtual kassa cheklarining haqqoniyligini QR-kod orqali tekshirish imkoninini beradigan axborot tizimlari va mobil ilovalarni ishlab chiqish;
• fiskal modul va onlayn-NKM va (yoki) virtual kassa dasturiy mahsuloti o‘rtasida ma’lumotlarni almashish talablarini va shakllarini ishlab chiqish;
• fiskal modulni texnik jihatdan mos keladigan onlayn-NKM va virtual kassalarning dasturiy tizimi bilan integratsiyalashtirishga ko‘maklashish.

Fiskal ma'lumotlar operatori xizmati uchun 1-to'lov onlayn-NKM yoki virtual kassa soliq organlarida ro'yxatdan o'tkazilgandan so'ng darhol amalga oshiriladi. Keyingi to‘lov 1 yildan so‘ng. Muddat tugashidan bir oy oldin soliq to'lovchining shaxsiy kabinetiga to'lovni amalga oshirish zarurligi to'g'risida xabarnoma yuboriladi.