Яқинда Telegram ижтимоий тармоғидаги каналларида ва маҳаллий ОАВда “Солиқчиларнинг олибсотарлар билан тили бирми?” сарлавҳаси остидаги мақола эълон қилинди.

Давлат солиқ қўмитаси ушбу мақола юзасидан ўз муносабатини билдиради.

Мақолада кейинги кунларда ҳафтада бир марта бозор бўладиган чекка ҳудудлардаги деҳқон бозорларида бир қоп уннинг баҳоси 245 минг сўмга чиқиб кетгани, аҳоли ун нархининг яна ошиб кетишидан хавотирда эканлиги келтирилиб, муаллиф солиқчиларни олибсотарлар билан тили бирми деган саволни келтирган.

Таъкидлаш лозимки, карантин даврида айрим инсофсиз тадбиркорлар томонидан нарх-навонинг асоссиз оширилиши билан боғлиқ ҳолатлар аниқланиб, улар бўйича қонунчилик доирасида тегишли тушунтириш-тарғибот ишлари олиб борилмоқда.

Бундан ташқари, бугунги мураккаб вазиятда тадбиркорлар учун иқтисодий қийинчиликларни енгиб ўтишда давлат томонидан барча керакли ёрдам чоралари кўрилаётгани етказилмоқда ҳамда имтиёзлар тақдим этилмоқда. Ўз навбатида, тадбиркорлар бунга муносиб жавоб сифатида нархларни оширмасликка чақирилмоқда.

Ушбу ишларда нафақат давлат солиқ хизмати , Бош прокуратура ҳузуридаги Департамент, маҳаллий ҳокимликлар ва бозор маъмурияти вакиллари бирдай жавобгарликни ҳис қилган ҳолда ҳаракат қилмоқда.

Ҳукуматимизнинг жорий йил 16 апрелдаги “Коронавирус пандемияси шароитида республика аҳолисини давлат ресурлари ҳисобига ун маҳсулотларини тизимли ва кафолатли етказиб бериш чора-тадбирлари тўғрисида”ги йиғилишида юзага келган вазиятни инобатга олиб ун маҳсулоти барча ҳудуларга бир маромда етказиб берилишини таъминлаш мақсадида биржа савдоларисиз тўғридан тўғри шартномалар билан сотилиши бўйича топшириқлар белгилаб берилди.

Шунингдек, Ҳукумат топшириғига асосан, “Ўздонмаҳсулот” АК тизим корхоналарида ишлаб чиқарилган бир қоп ун учун 125 минг сўм нарх  белгиланди.

“Ўздонмаҳсулот” АК маълумотига кўра, бугунги кунда тизим корхоналари омборларида 32 минг тоннадан ортиқ ун захиралари бор ва эҳтиёждан келиб чиқиб ишлаб чиқариш хажмларини ошириш имкониятлари мавжуд. Тизим корхоналари омборларида республикамиз аҳолисининг ун маҳсулотига бўлган талабини тўла қондириш учун етарли миқдорда дон захиралари етарли.

Маълумот учун, мамлакатимизда коронавирус пандемияси сабабли карантин эълон қилингандан буён Инқирозга қарши курашиш республика комиссияси топшириғига асосан нарх-навони асоссиз равишда ўсишини олдини олиш бўйича Давлат солиқ хизмати органларининг барча тузилмаларида ШТАБлар ташкил этилди.

Мазкур, Штаблар таркибига солиқ идоралари ходимларидан ташқари Бош прокуратура хузуридаги Иқтисодий жиноятларга қарши курашиш департаментидан ходимлар киритилди.

Солиқ идораларидан ушбу ШТАБларга доимий асосида ишлаш учун 2700 нафарга яқин ходимлар сафарбар қилинган.

Нахларни асоссиз оширилишига йўл қўмаслик учун 37 мингта савдо объектлари бўйича доимий назорат ўрнатилган.

360 та деҳқон бозорларида солиқ идоралари, Бош прокуратура ҳузуридаги департамент, ҳудудий ҳокимлик ва бозор маъмурияти вакилларидан иборат доимий фаолият олиб борувчи Ишчи гуруҳлар назорат олиб бормоқда.

Жумладан, карантин даврида (16 март-20 апрель) Давлат солиқ қўмитасида ташкил этилган ШТАБга ун нархининг асоссиз оширилиши юзасидан 9 мингдан зиёд мурожаат келиб тушиб, уларнинг 90 фоиздан ортиғи жойида ижобий ҳал этилди.

Шунингдек, бундай ҳолатларнинг аниқланишида ижтимоий тармоқларда эълон қилинаётган аниқ фактли маълумотлар ҳам асқотмоқда албатта.

Аммо юқоридаги мақолада қайд этилган ҳолат айнан қайси бозорда, қачон содир бўлганлиги маълум қилинмаган. Шу боис масаланинг долзарблигидан келиб чиқиб, профессионал жиҳатдан ёндашган ҳолда, ҳеч қандай шубҳага ўрин қолдирмай, аниқ фактлар билан тақдим этилиши мақсадга мувофиқ бўлар эди.

Шундагина ушбу ҳолат бўйича аниқ фактлар асосида тегишли профилактик ва назорат тадбирларини ташкил этиш имконияти пайдо бўлади.

Ҳурматли фуқаролар, жойларда озиқ-овқат ва бошқа бирламчи зарур маҳсулотлар нархининг асоссиз оширилиш ҳолатларига дуч келсангиз, 24 соатли режимда ишловчи ДСҚнинг “Ишонч телефони” – (71)244-98-98 ва 1198 қисқа рақамли “Call-маркази”га мурожаат қилишингизни сўраймиз.

ДСҚ Матбуот хизмати.