2022-yil 1-apreldan...

1) 2024-yil 31-dekabrgacha: 

• O‘zbekiston rezidenti va norezidenti bo‘lgan jismoniy shaxslarning aksiyalar bo‘yicha hisoblangan dividendlar tarzidagi daromadlari daromad solig‘idan ozod qilinadi; 
• norezident yuridik shaxslarning aksiyalar bo‘yicha hisoblangan dividendlariga foyda solig‘ining 5 % stavkasi tatbiq etiladi; 
• rezident va norezident jismoniy va yuridik shaxslarning xo‘jalik jamiyatlari obligatsiyalari bo‘yicha daromadlari JShODS va foyda solig‘idan ozod qilinadi. 

2) Nodavlat maktabgacha ta’lim tashkilotlari va maktablarga farzandlarini yuborayotgan ota-onalarning oyiga 3 mln so‘mgacha bo‘lgan to‘lovlari daromad solig‘idan ozod etiladi.

3) Ishlab chiqaruvchilardan 1.01.2025-yilgacha ijtimoiy soliq stavkasi 1 % miqdorda undiriladi. Agar:

• yalpi tushumida bolalar, ayollar va sport poyabzallari, sun’iy (eko) charm, furnitura, poyabzal qoliplari va tagliklari ishlab chiqarishdan tushgan tushumning ulushi kamida 60 %ni;
• yalpi tushumining umumiy hajmida poyabzallar, charm-attorlik mahsulotlari va mo‘ynadan tayyorlangan buyumlar eksportidan tushgan tushumning hajmi 80 %ni tashkil qilsa.

4) Tadbirkorlik subyektlari uchun 1.01.2025-yilgacha quyidagilar bo‘yicha ijtimoiy soliq stavkasi 1 % etib belgilanadi:

• chakana savdo va umumiy ovqatlanish;
• mehmonxona (joylashtirish) xizmatlari;
• avtotransportda yo‘lovchi va yuk tashish; 
• transport vositalarini ta’mirlash va texnik xizmat ko‘rsatish;
• kompyuter xizmatlari; 
• maishiy texnikani ta’mirlash;
• agro va veterinariya;
• ko‘ngilochar maskanlarda ko‘rsatiladigan xizmatlar.

Bunda: 

• ushbu stavka yuqoridagi faoliyat turlaridan olingan daromad soliq davrida jami daromadning kamida 60 %ini tashkil etganda qo‘llaniladi. 
• yuqoridagi faoliyat turlari bilan shug‘ullanuvchilar tomonidan xodimlar sonini yashirish holatlari aniqlanganda, mazkur soliq imtiyozining amal qilishi to‘xtatiladi va qonunchilikda belgilangan moliyaviy sanksiyalar qo‘llaniladi.

5) 1.01.2025-yilga qadar tuman va shaharlarda belgilanadigan turizm hududlarida ro‘yxatdan o‘tgan hamda ushbu hududda umumiy ovqatlanish, mehmonxona (joylashtirish), savdo, ko‘ngilochar, turoperator va turagent xizmatlarini ko‘rsatayotgan tadbirkorlik subyektlari uchun:

• aylanmadan olinadigan soliq stavkasi – 1 % etib belgilanadi;
• ushbu hududlardagi obyektlar va ular egallagan yer uchastkasi bo‘yicha yuridik shaxslarning mol-mulk va yer solig‘i miqdorlari – mazkur soliqlar bo‘yicha hisoblangan summaning 1 %i miqdorida belgilanadi.

6) Qishloq joylarda antenna-machta metall konstruksiyalarini, ularga o‘rnatilgan va ularning ajralmas qismi bo‘lgan konstruksiyalar hamda ular egallagan yer uchastkalari yuridik shaxslarning mol-mulk va yer solig‘idan ozod etiladi. 

7) 31.12.2022-yilga qadar tajriba tariqasida “Navoiy kon-metallurgiya kombinati” AJ, “Olmaliq kon-metallurgiya kombinati” AJ va “Uzbekistan Airways” AJ misolida tovarlarni import qilishda va tovarlarni (xizmatlarni) realizatsiya qilishda to‘lanadigan QQS summalarini o‘zaro hisobga olish tartibi joriy qilinadi.

8) 1.01.2024-yilga qadar muddatga hisobot davri yakunlari bo‘yicha elektrotexnika mahsulotlarini sotishdan tushgan tushumi miqdori umumiy tushumining 80 %idan kam bo‘lmagan elektrotexnika tarmog‘i korxonalariga foyda solig‘i va mol-mulk solig‘i bo‘yicha stavkalarni 50 foizga kamaytirish tarzida soliq imtiyozlari beriladi.

9) 1.01.2025-yilgacha milliy musiqa cholg‘u asboblarini ishlab chiqarishdan olgan daromadlari joriy hisobot (soliq) davri yakunlari bo‘yicha jami daromadning kamida 60 %ini tashkil etadigan tashkilotlar uchun aylanmadan soliq va ijtimoiy soliq stavkasi 1 % etib belgilanadi.

10) Xususiy jismoniy tarbiya va sport tashkilotlarining xizmatlarini realizatsiya qilish bo‘yicha aylanmasini QQSdan ozod qilish tarzidagi imtiyoz bekor bo‘ladi. Ushbu imtiyoz budjet tashkilotlari tomonidan ko‘rsatiladigan jismoniy tarbiya va sportga doir xizmatlarni realizatsiya qilish bo‘yicha anlanmaga nisbatan tatbiq etiladi.

11) Banklarining qiymati qat’iy summada belgilangan xizmatlari uchun QQS bo‘yicha belgilangan imtiyoz bekor bo‘ladi.