Shikoyat va unga ilova qilinadigan hujjatlar soliq organiga yozma yoki elektron shaklda yuborilishi mumkin. Unda quyidagilar ko‘rsatiladi:

1) jismoniy shaxsning familiyasi, ismi, otasining ismi hamda yashash joyi yoki shikoyat berayotgan yuridik shaxsning nomi va manzili;

2) soliq organining normativ xususiyatga ega bo‘lmagan hujjati, mansabdor shaxsning harakatlari (harakatsizligi) ustidan berilayotgan shikoyat;

3) soliq organining nomi, normativ xususiyatga ega bo‘lmagan hujjat, ustidan shikoyat berilayotgan mansabdor shaxslarning harakatlari (harakatsizligi);

4) shikoyat berayotgan shaxs o‘zining huquqlari qaysi asoslarga ko‘ra buzilgan deb hisoblasa, o‘sha asoslar;

5) shikoyat berayotgan shaxsning talablari.

Shuningdek, shikoyatni ko‘rib chiqish uchun zarur bo‘lgan boshqa ma’lumotlar ilova qilinishi mumkin. 

* Shikoyat uni bergan shaxs yoki uning vakili tomonidan imzolanadi.

Soliq organlarining sayyor soliq tekshiruvlari va soliq auditi natijalari bo‘yicha qabul qilingan qarorlari ustidan shikoyat yuqori turuvchi soliq organiga qarorlari ustidan shikoyat qilinayotgan soliq organi orqali beriladi.

Qarorlari ustidan shikoyat qilinayotgan soliq organi bunday ariza kelib tushgan kundan e’tiboran uch kun ichida uni yuqori turuvchi soliq organiga barcha materiallar bilan birga yuborishi shart.

Soliq organlarining sayyor soliq tekshiruvlari va soliq auditi natijalari bo‘yicha qabul qilingan qarorlari ustidan shikoyat shaxs o‘z huquqlari buzilganligi to‘g‘risida bilgan yoki bilishi kerak bo‘lgan kundan e’tiboran bir oy ichida berilishi mumkin. 

Agar yuqorida qayd etilgan muddat uzrli sababga ko‘ra o‘tkazib yuborilgan taqdirda, ushbu muddat shikoyat berayotgan shaxsning iltimosnomasi bo‘yicha yuqori turuvchi soliq organi tomonidan tiklanishi mumkin.

- shikoyatni qanoatlantirmasdan qoldiradi;

- soliq organining normativ xususiyatga ega bo‘lmagan hujjatini bekor qiladi;

- soliq organining qarorini to‘liq yoki qisman bekor qiladi;

- soliq organining qarorini to‘liq bekor qiladi va ish yuzasidan yangi qaror qabul qiladi; 

- soliq organlari mansabdor shaxslarining harakatlarini (harakatsizligini) noqonuniy deb e’tirof etadi va ishning mohiyati bo‘yicha qaror chiqaradi.

Yuqori turuvchi soliq organi, agar quyidagilarni aniqlagan bo‘lsa, shikoyatni to‘liq yoki qisman ko‘rmasdan qoldiradi:

1) shikoyat shikoyatni bergan shaxs yoki uning vakili tomonidan imzolanmagan bo‘lsa yoxud vakilning shikoyatni imzolash uchun vakolatlarini tasdiqlovchi belgilangan tartibda rasmiylashtirilgan hujjatlar taqdim etilmagan bo‘lsa;

2) shikoyat Soliq kodeksida belgilangan shikoyat berish muddati tugaganidan keyin berilgan va uni tiklash to‘g‘risidagi iltimosnomani o‘z ichiga olmagan bo‘lsa yoki shikoyat berish uchun o‘tkazib yuborilgan muddatni tiklash rad etilgan bo‘lsa;

3) shikoyat bo‘yicha qaror qabul qilinishiga qadar shikoyatni bergan shaxs nomidan shikoyatni to‘liq yoki qisman chaqirib olish to‘g‘risidagi ariza kelib tushgan bo‘lsa;

4) ilgari aynan o‘sha asoslar bo‘yicha shikoyat berilgan bo‘lsa;

5) shikoyat soliq organining ilgari shikoyat qilingan qarori ustidan berilgan bo‘lsa;

6) shikoyat berish tartibi buzilgan holda berilgan bo‘lsa;

7) shikoyat belgilangan tartibda rasmiylashtirilmagan bo‘lsa; 

8) shikoyat qo‘zg‘atilgan jinoyat ishi doirasida yoki soliq to‘lovchi sudga shikoyat masalasi bo‘yicha murojaat qilganda berilgan bo‘lsa.

Soliq organlarining sayyor soliq tekshiruvlari va soliq auditi natijasi yuzasidan qabul qilingan qaror ustidan berilgan shikoyat yuqori turuvchi soliq organi tomonidan 1 oy muddatda ko‘rib chiqiladi hamda zarur hollarda 15 kundan ortiq bo‘lmagan muddatga uzaytirilishi mumkin.

Boshqa shikoyatlar yuqori turuvchi soliq organi tomonidan 15 kun muddatda ko‘rib chiqiladi hamda zarur hollarda 15 kundan ortiq bo‘lmagan muddatga uzaytirilishi mumkin. 

* Shikoyatni ko‘rib chiqish natijasi bo‘yicha shikoyat bergan shaxsga 3 kun ichida ma’lum qilinadi.